27 Novemba 2020

Halmashauri ya Manispaa ya Ilala yaadhimisha siku ya Mlipa Kodi

 Na,Rosetha Gange 

Halmashauri ya Manispaa ya Ilala  imeadhimisha siku ya mlipa kodi ikiambatana na utoaji wa elimu kwa mlipa kodi na ugawaji wa tuzo kwa wafanyabiasha na taasisi mbalimbali ambazo ni vinara wa kulipa Kodi na kuchangia mapato ya Halmashauri ya Manispaa ya Ilala.

Akihutubia katika hafla hiyo Mkurugenzi wa Halmashauri ya Manispaa ya Ilala Ndg. Jumanne Shauri aliwapongeza na kuwashukuru wafanyabiasha wote kwa mchango wao mkubwa kwa Manispaa ya Ilala kwani kupitia Kodi wanazolipa,Serikali inaweza kutekeleza mipango mbalimbali ya maendeleo mfano, ujenzi wa Barabara, zahanati na madarasa. Pia kupitia Kodi wanazotoa wafanyabiasharara wengine na wajasiriamali wadogo wanaweza kukopeshwa mitaji na kukuza biashara zao hivyo kuongeza mapato ya Halmashauri na kuleta maendeleo ya Taifa letu.

Akinukuu maneno ya Rais wa Jamuhuri ya Muungano wa Tanzania Mh .Dr. John Pombe Magufuli kuhusu maendeleo ya nchi yetu alisema

 "Hakuna mtu atakayetusaidia maendeleo yetu Watanzania.Maendeleo yetu watanzania tutayajenga sisi wenyewe kwa kutumia Kodi zetu wenyewe."

Aidha, amewataka walipa kodi hao kuendelea kulipa Kodi kwani ni kitendo cha kizalendo na tuzo hizo walizopewa ziwe ni chachu ya kuendelea kuchangia mapato ya Halmashauri ya Manispaa ya Ilala hivyo kuleta maendeleo katika taifa letu.

Akitoa salamu za Serikali mgeni Rasmi katika hafla hiyo Mkuu wa Wilaya ya Ilala Mh.Ng'wilabuzu Ludigija alitoa pongezi kwa wafanyabiashara wote waliopata tuzo hizo na kuwaomba wakawe mabalozi kwa wafanyabiashara wengine.Vilevile amewaahidi ushirikiano pale watakapokuwa na matatizo yoyote ofisi yake itakuwa tayari kuwasikiliza na kushughulikia ipasavyo.

Aidha, ametoa rai kwa wafanyabiashara wote nchi nzima kufuata mifumo rasmi ya ukusanyaji kodi iliyowekwa na serikali na sio kutumia watu wengine wa katikati ambao wanaweza kutumia njia za udanganyifu na mwisho kujikuta wanaingia matatani.

Mapato ya Halmashauri ya Manispaa ya Ilala yameweza kuongezeka kwa 10% ndani ya kipindi Cha miaka mitatu kutoka Billioni 46 mwaka 2017/2018 mpaka Bilioni 57 mwaka 2019/2020 na matarajio ya mpaka kufikia mwaka 2025 ni kukusanya Bilioni 100.

Siku ya Mlipa Kodi Ilala

17 Novemba 2020

Wiki ya Usafi wa Mazingira yazinduliwa; Walimu wa afya mashuleni na Wafanyakazi wa Afya ya Jamii wapata mafunzo

 

Na; Shamimu Msuya

Halmashauri ya Manispaa ya Ilala imefanya mafunzo kwa walimu wa Afya, CHW (Community Health Workers) na maafisa Afya wa Wilaya kuadhimisha wiki ya usafi na siku ya choo duniani.

Mafunzo hayo yametolewa kupitia Wizara ya Afya, Maendeleo ya Jamii, Jinsia, Wazee na Watoto na Manispaa ya Ilala chini ya mdau wake AMREF kwa lengo la kuelimisha jamii hasa wanafunzi mashuleni juu ya umuhimu wa usafi wa mazingira, kujikinga na magonjwa na matumizi sahihi ya choo




.Aidha, Afisa Afya wa Manispaa ya Ilala Bi. Esther Ng’ang’ano ameeleza kuwa mafunzo hayo yatafanyika kwa siku nne (04) kwa shule 19 kutoka kata 6 zinazofanyiwa maboresho na AMREF ambapo tarehe 16 – 18 Novemba, 2020 ni siku za mafunzo kwa walimu wa afya, CHW pamoja na maafisa afya yakiambatana na utoaji wa elimu ya afya mashuleni na kilele ni tarehe 19 Novemba, 2020 ambapo kutakuwa na hafla fupi na utoaji wa zawadi kwa wanafunzi watakao wasilisha vizuri elimu waliyopata.








Sambamba na hayo, Afisa mradi usafi wa mazingira na afya (AMREF) Bi. Annastazia Lutatina ameeleza kuwa wanashirikiana na Manispaa ya Ilala kama mdau katika kuadhimisha wiki ya usafi na siku ya choo duniani kwa kufanya shughuli mbalimbali ikiwemo kutoa elimu ya usafi wa mazingira, kunawa mikono na matumizi sahihi ya choo kwa wananchi hasa wanafunzi mashuleni na wamechagua kata 6 ambazo zinafanyiwa maboresho na AMREF kupitia mradi wake wa HBC (Hygiene and Behavior Change) unaofanyika kwenye Manispaa ya Ilala.



                  Afisa mradi usafi wa mazingira na afya (AMREF) Bi. Annastazia Lutatina


Hata hivyo, Bi. Annastazia amemalizia kwa kusema kuwa, lengo kuu la kufanya mfulilizo wa shughuli hizo za kijamii ni kuelimisha jamii na kusaidia kufufua Club za afya mashuleni ili kutokomeza maambukizi ya magonjwa ya mlipuko na kujenga tabia ya usafi kwa wanafunzi na jamii kwa ujumla.

24 Oktoba 2020

Mahafali ya 18 Shule ya Msingi Diamond yafana

 Na: Hashim Jumbe

Siku zimepita na miaka imekwenda, hatimaye ile siku iliyokuwa ikingojewa  kwa hamu ikawadia, ni siku itakayobaki kukumbukwa na wazazi, wanafunzi na walimu wa shule ya msingi Diamond, ni siku niifananishayo na ile iliyotajwa na Muandishi Ben R. Mtobwa kwenye Riwaya ya 'Zawadi ya Ushindi' siku ambayo muhusika Sikamona anarudi kutoka vitani na kukabidhiwa zawadi aliyoahidiwa na mchumba wake Rusia, nayo ni zawadi ya ushindi.

Miaka Saba (7) ya elimu ya msingi imetamatika kwa vijana walioianza safari yao ya kielimu mwaka 2014, ambapo siku ya leo imekuwa ya furaha huku bashasha zikitawala kwenye nyuso zao wakati wa mahafali ya 18 ya kuwaaga yaliyofanyika leo katika shule ya msingi Diamond.

"haikuwa kazi rahisi kwa vijana hawa, nakumbuka mwaka 2013 wakati tunawafanyia usahili waweze kuingia darasa la kwanza, walikuwa wadogo mno, wengine mpaka walikuwa wanapotea madarasa ya kufanyia mtihani, nashukuru leo nimewaona wakiwa wakubwa na furaha yangu ni kwamba wameweza kutuletea heshima kwa kufanya vizuri kwenye mitihani yao ya utimilifu, lakini naamini na mtihani wa Taifa watakuwa wamefanya vizuri pia" Bi. Elizabeth Thomas, Afisa Elimu Msingi Manispaa ya Ilala

Aidha, mahafadhi ya 18 yaliyofanyika kwenye viwanja vya shule hiyo ya Diamond, yalichagizwa na burudani kutoka kwa wanafunzi waliohitimu shuleni hapo na yakahitimishwa na utoaji zawadi mbalimbali kwa wanafunzi waliofanya vizuri kwenye taaluma, michezo, nidhamu na uongozi bora














16 Oktoba 2020

Mkuu wa Idara ya Mazingira awaasa watumishi, akiwaaga waliostaafu

Na: Hashim Jumbe

Mkuu wa Idara ya Hifadhi ya Mazingira na Udhibiti Taka Ngumu Manispaa ya Ilala, Ndugu Abdon Mapunda, amewaasa watumishi wa idara yake kufanya kazi kwa weledi na kujituma ili kuweza kufikia malengo waliojiwekea kama idara.

Hayo ameyasema leo wakati wa hafla fupi ya kuwaaga watumishi wanne waliostaafu utumishi wa umma katika idara hiyo.

"Kwanza niwapongeze kwa kulitumikia Taifa mpaka kufikia kustaafu utumishi wa umma, ni faraja na heshima kubwa mno mmeipata, lakini pia niendelee kuwaasa mnaoendelea na utumishi wa umma kujitoa na kuwa waadilifu katika kazi zenu ndipo mtaweza kufanikiwa" alisema bwana Mapunda.

Itakumbukwa kuwa, idara  ya hifadhi ya mazingira na udhibiti taka ngumu, imekuwa na utamaduni wa kila mwaka kukutana na kufanya tathmini ya kiutendaji pamoja na wadau wao wa mazingira, huku wakitumia nafasi hiyo kuwapongeza waliofanya vizuri.

Aidha, kwa mwaka huu kikao hicho kimeambatana na kuwaaga watumishi watano waliomaliza muda wao ambao ni; Feada Magesa, Abdallah Waziri, Selemani Omary, Edward Mwasumbwe na Emmanuel Maganga



6 Oktoba 2020

Wanafunzi Ilala waahidi kufanya vizuri mtihani wa kumaliza Darasa la Saba mwaka 2020

 Na: Hashim Jumbe

Wanafunzi wa Darasa la Saba katika Shule za Manispaa ya Ilala, leo wametoa ahadi ya kufanya vizuri katika mtihani wao wa kumaliza elimu ya msingi unaotarajiwa kufanyika nchini kote tarehe 07-08 Oktoba, 2020.

 Ahadi hiyo ya kufanya vizuri katika mtihani wao wameitoa mbele ya Afisa Elimu Msingi Manispaa ya Ilala Bi. Elizabeth Thomas alipotembelea Shule ya Msingi Buguruni na Majani ya Chai na kuzungumza na Watahiniwa hao kwa niaba ya wenzao wote watakaofanya mtihani huo.

 Wanafunzi hao walitoa ahadi ya kufanya vizuri kwa kuzingatia maandalizi waliyoyafanya na matokeo ya mtihani wa utimilifu kwa ngazi ya Wilaya na Mkoa yalizidi kuwapa ujasiri huku wakitumia mitihani hiyo kujiandaa vizuri zaidi.

"Tumefanya maandalizi ya kutosha na tunaimani tutafanya vizuri zaidi na wote tutafaulu kwenda Sekondari" alisema mmoja kati ya wanafunzi wa Shule ya Msingi Majani ya Chai

Akizungumza na Wanafunzi hao, Afisa Elimu Msingi Manispaa ya Ilala Bi. Elizabeth Thomas aliwataka wanafunzi hao kuanza kwa kumtanguliza Mungu na kujiamini huku wakizingatia maelekezo yote ya mtihani "ninawatakia heri wanafunzi wote, mfanye vizuri na mie nitakuwa wa kwanza kuangalia matokeo ya shule yenu, sasa msije mkawaangusha walimu wenu"

Mtihani wa kumaliza elimu ya msingi (PSLE) 2020 kwa Manispaa ya Ilala utahusisha Jumla ya Watahiniwa 28,280 ambapo Wavulana ni 13,802 na Wasichana 14,478